Le scioz plü prezius dla tera dles muntes ê la Rajëta. Por concuisté na jona nobla dla Val Badia ê n ciavalier jü sön Gherdenacia a chirí la Rajëta y â spo salpü da na gana pro le Lech de Crespëina che ara ê ascognüda tl bosch de Lamarida sot le Ciastel de Dona Dindia. Al ê n dragun che ti fajô da vardian. Le ciavalier l’â ciafada, â copé le dragun mo ê instës gnü copé dal dragun. Les desgrazies â scomencé por gauja de n spidl striné, cun chël che ara jô da odëi i pinsiers de chi che se spidlâ laite, che ti ê gnü scinché a Dona Dindia da n striun. Do les desgrazies che ti ê sozedüdes a ara y a so om, fondadus dl paisc de Miljera -Cortina d’Anpezo sot al Faloria, l’âra sciuré tl Lech Vërt sön Fanes, le lech che á ciafé l’inom dal corú dl tosser che é gnü fora dal spidl. N salvan ti ê sté da trá fora le spidl dal funz dl lech y l’â scinché ala jona nobla, che fajô spidlé laite sü amiradus por odëi sce ai ê sinziers. Le ciavalier che â superé la proa y a chël che ara ti orô bun ti â damané da desdrüje le spidl, mo la jona s’â dessené y ti â damané da jí a chirí la Rajëta, gaujan süa mort.
An cunta che tla nöt de San Jan él da odëi florí i scioc sö por i crëps. Al é dër ri da ti rové pormez, deache al é creatöres da temëi y spiric che ti fej da vardians. Por se tó i scioc él da superé proes che se damana gran coraje.
Biblioteca digitala –Le scioz da San Jenn, La bisca blancia, L’tejoro de Cherz, I tejori di Ladins, L scioz dla dlieja de Val, La funtana da Puntives
© düc i dërc resservá
